ໂຮມຊຸມນຸມວັນແຫ່ງຊາດຕ້ານຢາເສບຕິດ ຄົບຮອບ 11


ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ໄດ້​ຮ່ວມ​ກັບ​ຄະ­ນະ​ກຳ­ມະ­ການ​ແຫ່ງ​ຊາດ​ເພື່ອ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ຈັດ​ງານ​ໂຮມ​ຊຸມ­ນຸມ ເນື່ອງ​ໃນ​ໂອ­ກາດ​ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ຄົບ­ຮອບ 11 ປີ (12/10/2001-12/10/2012) ຂຶ້ນ​ວັນ​ທີ 11ຕຸ­ລາ 2012ຢູ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ສຸ​ກັນ ມະ­ຫາ­ລາດ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ອາ​ຊາງ ລາວ​ລີ ຮອງ​ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ ທັງ​ເປັນ​ຜູ້​ຊີ້​ນຳ​ວຽກ​ງານ​ວັດ­ທະ­ນະ­ທຳ-ສັງ­ຄົມ ພ້ອມ​ທັງ​ບັນ­ດາ​ລັດ­ຖະ­ມົນ­ຕີ ເຈົ້າ­ແຂວງ ທູ­ຕາ­ນຸ­ທູດ ອົງ​ການ­ຈັດ­ຕັ້ງ​ສາ­ກົນ ແລະ ພາກ­ສ່ວນ​ກ່ຽວ­ຂ້ອງ.

ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ແມ່ນ​ເລີ່ມ​ຈາກ​ລັດ​ຖະ​ດຳ­ລັດ ສະ­ບັບ​ເລກ​ທີ 102/ສປປ ລົງ​ວັນ​ທີ 15 ຕຸ­ລາ 2001 ໂດຍ​ໄດ້​ແຕ່ງ­ຕັ້ງ​ຄະ­ນະ​ຊີ້​ນຳ​ຂະ​ບວນ​ການ​ຕ້ານ​ຢາ​ເສບ​ຕິດ​ຂັ້ນ​ສູນ​ກາງ​ຂຶ້ນ ເພື່ອ​ເຮັດ​ໜ້າ­ທີ່​ຊີ້​ນຳ-ນຳ­ພາ ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ທີ່​ມີ­ໜ້າ​ທີ່​ຮັບ­ຜິດ­ຊອບ​ໂດຍ​ກົງ ໃນ​ການ​ປຸກ­ລະ­ດົມ​ຂົນ­ຂວາຍ​ໃຫ້​ປວງ​ຊົນ​ເຂົ້າ​ຮ່ວມ​ຕ້ານ​ຢາ​ເສບ​ຕິດ ປິ່ນ­ປົວ ແລະ ຟື້ນ​ຟູ​ສຸ­ຂະ­ພາບ​ຜູ້​ຕິດ​ຢາ​ເສບ​ຕິດ ດຳ­ເນີນ​ມາດ​ຕະ­ການ​ດ້ານ​ກົດ­ໝາຍ​ຕໍ່​ຜູ້​ກະ­ທຳ​ຜິດ​ທີ່​ກ່ຽວ­ຂ້ອງ​ກັບ​ຢາ​ເສບ​ຕິດ ແລະ ຮ່ວມ​ມື​ກັບ​ສາ­ກົນ ໃນ​ການ​ຄວບ​ຄຸມ​ຢາ​ເສບ​ຕິດ​ໃຫ້​ປະ­ກົດ​ຜົນ​ເປັນ​ຈິງ ເພື່ອ​ເຮັດ​ສຳ­ເລັດ​ຕາມ​ພາ­ລະ​ບົດ­ບາດ ແລະ ໜ້າ­ທີ່​ຂອງ​ຄະ­ນະ​ດັ່ງ­ກ່າວ ລັດ­ຖະ­ບານ​ແຫ່ງ ສປປ ລາວ ຈຶ່ງ​ໄດ້​ກຳ­ນົດ​ເອົາ​ວັນ​ທີ 12 ຕຸ­ລາ ເປັນ​ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ນັບ​ແຕ່​ປີ 2001 ເປັນ ຕົ້ນ​ມາ ໂດຍ​ປີ​ນີ້​ຄົບ­ຮອບ 11 ປີ​ພໍ­ດີ ຈຸດ­ປະ­ສົງ​ຂອງ​ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ແມ່ນ​ເພື່ອ​ປຸກ­ລະ­ດົມ​ຂົນ­ຂວາຍ​ໃຫ້​ປວງ​ຊົນ​ລາວ​ບັນ­ດາ­ເຜົ່າ ທຸກ​ເພດ​ທຸກ​ໄວ​ໃນ​ຂອບ​ເຂດ​ທົ່ວ​ປະ­ເທດ ເຫັນ​ໄດ້​ພິດ​ໄພ​ອັນ­ຕະ­ລາຍ​ຂອງ​ຢາ​ເສບ​ຕິດ ແລະ ຮ່ວມ​ແຮງ​ຮ່ວມ​ໃຈ ພ້ອມ​ກັນ​ຕ້ານ​ຢາ​ເສບ​ຕິດ ໂດຍ​ສະ­ເພາະ​ແມ່ນ​ເລັ່ງ​ໃສ່​ລູກ​ຮັກ​ຫຼານ​ແພງ​ຂອງ​ຕົນ ບໍ່​ໃຫ້​ຫຼົງ​ຜິດ​ໄປ​ຕົກ ເປັນ​ທາດ​ຂອງ​ຢາ​ເສບ​ຕິດ ພ້ອມ​ທັງ​ເຮັດ​ແນວ­ໃດ​ເພື່ອ​ຄວບ​ຄຸມ​ໃຫ້​ບັນ­ຫາ​ຢາ​ເສບ​ຕິດ​ນັບ​ມື້​ຫຼຸດ​ໜ້ອຍ​ຖອຍ​ລົງ.

ໃນ​ພິ­ທີ​ອັນ​ມີ​ຄວາ​ໝາຍ​ສຳ­ຄັນ​ນີ້ ທ່ານ ອາ​ຊາງ ລາວ​ລີ ກໍ​ໄດ້​ຕາງ­ໜ້າ​ໃຫ້​ລັດ­ຖະ­ບານ​ແຫ່ງ ສປປ ລາວ ຂຶ້ນ​ໃຫ້​ທິດ​ຊີ້​ນຳ​ຕໍ່​ວຽກ​ງານ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ໂດຍ​ທ່ານ​ໄດ້​ຮຽກ­ຮ້ອງ​ມາ​ຍັງ​ທົ່ວ​ພັກ ທົ່ວ​ລັດ ແລະ ປວງ​ຊົນ​ທັງ​ຊາດ ຈົ່ງ​ຍົກ​ລະ­ດັບ​ຄວາມ​ຮັບ­ຜິດ­ຊອບ​ທາງ​ດ້ານ​ການ­ເມືອງ ກ່ຽວ​ກັບ​ວຽກ​ງານ​ຕ້ານ ແລະ ສະ­ກັດ​ກັ້ນ​ການ​ແຜ່​ຂະ­ຫຍາຍ​ຂອງ​ຢາ​ເສບ​ຕິດ ພ້ອມ​ທັງ​ເພີ່ມ​ທະ­ວີ​ຄວາມ​ເປັນ​ເຈົ້າ​ການ​ເພື່ອ​ເຂົ້າ​ຮ່ວມ​ການ​ສະ­ກັດ​ກັ້ນ ແລະ ແກ້​ໄຂ​ບັນ­ຫາ​ຢາ​ເສບ​ຕິດ ໃຫ້​ມີ​ປະ​ສິດ­ທິ​ຜົນ​ສູງ​ຂຶ້ນ​ເລື້ອຍໆ.

Categories: Uncategorized | ใส่ความเห็น

ຈະສ້າງສຳນັກງານໜັງສືພິມປະຊາຊົນຫຼັງໃໝ່


ພິ­ທີ​ເຊັນ​ສັນ­ຍາ​ການ​ກໍ່­ສ້າງ​ສຳ­ນັກ­ງານ​ໜັງ­ສື­ພິມ​ປະ­ຊາ­ຊົນ ແລະ ໜັງ­ສື­ພິມ​ພາ­ສາ​ຕ່າງ­ປະ­ເທດ​ຫຼັງ​ໃໝ່ ໄດ້​ຈັດ​ຂຶ້ນ​ວັນ​ທີ 10 ຕຸ­ລາ 2012 ຜ່ານ​ມາ ທີ່​ສຳ­ນັກ­ງານ​ໜັງ­ສື­ພິມ​ພາ­ສາ​ຕ່າງ­ປະ­ເທດ ໃຫ້​ກຽດ​ລົງ​ນາມ​ແມ່ນ​ທ່ານ ສະ­ຫວັນ​ຄອນ ຣາ​ຊະ​ມຸນ­ຕີ ລັດ­ຖະ­ມົນ­ຕີ​ຊ່ວຍ​ວ່າ­ການ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ແລະ ທ່ານ ທັດ​ນະ­ຄອນ ທຳ​ມະ​ວົງ ປະ­ທານ​ບໍ­ລິ­ສັດ​ທີ​ເຄ​ກໍ່­ສ້າງ ແລະ ຂົວ​ທາງ​ຈຳ­ກັດ ໂດຍ​ຊ້ອງ​ໜ້າ ທ່ານ ສຈ.ດຣ. ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ວ່າ­ການ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມີ​ບັນ­ດາ​ຫົວ­ໜ້າ​ກົມ ຮອງ​ກົມ​ອ້ອມ​ຂ້າງ​ກະ­ຊວງ ພ້ອມ​ແຂກ​ຖືກ​ເຊີນ​ທັງ​ສອງ​ຝ່າຍ​ເປັນ​ສັກ­ຂີ​ພິ­ຍານ.

ສຳ­ນັກ­ງານ​ໃໝ່​ຂອງ​ໜັງ­ສື­ພິມ​ປະ­ຊາ­ຊົນ ແລະ ໜັງ­ສື­ພິມ​ພາ­ສາ​ຕ່າງ­ປະ­ເທດ ຈະ​ສ້າງ​ຂຶ້ນ​ໃນ​ຮູບ​ແບບ​ທີ່​ມີ​ເອ­ກະ­ລັກ​ທາງ​ດ້ານ​ວັດ­ທະ­ນະ­ທຳ​ຂອງ​ຊາດ ມີ​ໂຄງ​ປະ­ກອບ​ພາຍ​ໃນ​ທີ່​ທັນ​ສະ­ໄໝ ຊຶ່ງ​ຕັ້ງ​ຢູ່​ບ້ານ​ໂພນ​ປ່າ​ເປົ້າ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໃນ​ເນື້ອ­ທີ່​ທັງ​ໝົດ 24.800 ຕາ​ແມັດ ເປັນ​ອາ­ຄານ 3 ຊັ້ນ 2 ຫຼັງ ແຕ່​ລະ​ຫຼັງ​ມີ​ຂະ­ໜາດ​ກວ້າງ 18 ແມັດ ຍາວ 30 ແມັດ ມີ​ຮົ້ວ​ອ້ອມ​ລະ­ບົບ​ໄຟ­ຟ້າ ກຳ­ນົດ​ການ​ກໍ່­ສ້າງ​ທັງ​ໝົດ 24 ເດືອນ​ໃຫ້​ສຳ­ເລັດ ພາຍ­ຫຼັງ​ເຊັນ​ສັນ­ຍາ​ໂດຍ​ແມ່ນ​ບໍ­ລິ­ສັດ​ທີ​ເຄ​ກໍ່­ສ້າງ ແລະ ຂົວ​ທາງ​ຈຳ­ກັດ ເປັນ​ຜູ້​ຮັບ​ເໝົາ​ກໍ່­ສ້າງ ໃນ​ມູນ​ຄ່າ​ທັງ​ໝົດ 2.776.800 ໂດ​ລາ​ສະ­ຫະ­ລັດ ການ​ກໍ່­ສ້າງ​ສຳ­ນັກ­ງານ​ໜັງ­ສື­ພິມ​ປະ­ຊາ­ຊົນ ແລະ ໜັງ­ສື­ພິມ​ພາ­ສາ​ຕ່າງ­ປະ­ເທດ​ຫຼັງ​ໃໝ່​ນີ້ ແມ່ນ​ເປັນ​ການ​ແລກ­ປ່ຽນ​ກັບ​ສຳ­ນັກ­ງານ​ເກົ່າ​ຂອງ​ໜັງ­ສື​ພີມ​ປະ­ຊາ­ຊົນ ແລະ ໜັງ­ສື­ພິມ​ພາ­ສາ​ຕ່າງ­ປະ­ເທດ​ຫຼັງ​ປັດ­ຈຸ­ບັນ ທັງ​ນີ້​ກໍ​ເພື່ອ​ອີງ­ໃສ່​ທີ່​ຕັ້ງ ແລະ ສະ­ຖານ­ທີ່​ຂອງ​ສຳ­ນັກ­ງານ​ຫຼັງ​ເກົ່າ​ທີ່​ມີ​ໜັງ­ສື­ພິມ​ປະ­ຊາ­ຊົນ ແລະ ໜັງ­ສື­ພິມ​ພາ­ສາ​ຕ່າງ­ປະ­ເທດ​ຢູ່​ໃນ​ຕຶກ​ດຽວ​ກັນ ບໍ່​ສາ­ມາດ​ຕອບ​ສະ­ໜອງ​ໄດ້​ຕາມ​ຄວາມ​ຮຽກ­ຮ້ອງ​ຕ້ອງ­ການ ການ​ພັດ­ທະ­ນາ.

Categories: Uncategorized | ใส่ความเห็น

ທຄຕລ ຈະປັບປ່ຽນໃຊ້ລະບົບບັນຊີ ແລະ ລະບົບກວດກາສາກົນ


ພິ­ທີ​ເຊັນ​ສັນ­ຍາ​ການ​ສ້າງ​ລະ­ບົບ​ບັນ­ຊີ ລະ­ບົບ​ລາຍ​ງານ​ວຽກ​ງານ​ການ​ຄຸ້ມ​ຄອງ ແລະ ກວດ­ກາ​ພາຍ​ໃນ​ຕາມ​ແບບ​ມາດ­ຕະ­ຖານ​ສາ­ກົນ ລະ­ຫວ່າງ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ (ທຄຕລ) ແລະ ບໍ­ລິ­ສັດ ເອີ​ສ​ແອນ​ຢັງ​ລາວ ຈຳ­ກັດ ໄດ້​ມີ​ຂຶ້ນ​ວັນ​ທີ 10 ຕຸ­ລາ 2012 ທີ່​ໂຮງ­ແຮມ​ດອນ​ຈັນ​ພາ​ເລດ ນະ­ຄອນ­ຫຼວງ​ວຽງ​ຈັນ ຮ່ວມ​ລົງ​ນາມ​ລະ­ຫວ່າງ ທ່ານ ວັນ​ຄຳ ວໍ­ລະ​ວົງ ຜູ້­ອຳ­ນວຍ­ການ​ໃຫຍ່ ທຄຕລ ແລະ ທ່ານ ເຈິ່ນ ດິງ​ເກື່ອງ ຂາ​ຫຸ້ນ ແລະ ຜູ້­ອຳ­ນວຍ­ການ​ໃຫຍ່ ບໍ­ລິ­ສັດ​ເອີ​ສ​ແອນ​ຢັງ ຫວຽດ­ນາມລາວ ແລະ ກຳ­ປູ­ເຈຍ ຊຶ່ງ​ມີ​ພາກ­ສ່ວນ​ທີ່​ກ່ຽວ­ຂ້ອງ​ທັງ​ສອງ​ຝ່າຍ ເຂົ້າ​ຮ່ວມ​ເປັນ​ພະ­ຍານ.

ການ​ເຊັນ​ສັນ­ຍາ​ຄັ້ງ​ນີ້ ກໍ​ເພື່ອ​ເປັນ​ການ​ສ້າງ​ຂີດ​ໝາຍ​ອັນ​ດີ​ໃຫ້​ແກ່ ທຄຕລ ໃນ​ການ​ກ້າວ​ໄປ​ສູ່​ການ​ນຳ​ໃຊ້​ລະ­ບົບ​ການ​ບັນ­ຊີ​ສາ­ກົນ ພາຍ​ໃຕ້​ການ​ຝຶກ​ອົບ­ຮົມ ແລະ ຊ່ວຍ­ເຫຼືອ​ດ້ານ​ເຕັກ­ນິກ ຈາກ​ບໍ­ລິ­ສັດ ເອີ​ສ​ແອນ​ຢັງ​ລາວ ຈຳ­ກັດ ຄື ພວກ​ເຮົາ​ຮູ້​ນຳ​ກັນ​ແລ້ວ​ວ່າ ລະ­ບົບ​ບັນ­ຊີ​ສາ­ກົນ ແລະ ລະ­ບົບ​ກວດ­ກາ​ພາຍ​ໃນ​ສາ­ກົນ ແມ່ນ​ເປັນ​ລະ­ບົບ​ບັນ­ຊີ ແລະ ລະ­ບົບ​ກວດ­ກາ ທີ່​ຖື​ວ່າ​ເປັນ​ມາດ­ຕະ­ຖານ​ຂອງ​ໂລກ ເຊິ່ງ​ກໍ​ມີ​ຫຼາຍ​ປະ­ເທດ​ໃນ​ໂລກ ທີ່​ໄດ້​ມີ​ກົດ​ບັງ­ຄັບ​ໃຫ້​ບໍ­ລິ­ສັດ ຫຼື ທະ­ນາ­ຄານ​ທີ່​ຈົດ​ທະ­ບຽນ​ເຂົ້າ​ໃນ​ຕະ­ຫຼາດ​ຫຼັກ​ຊັບ ຕ້ອງ​ໄດ້​ປະ­ຕິ­ບັດ ຊຶ່ງ​ປັດ­ຈຸ­ບັນ ມີ​ປະ­ມານ 120 ປະ­ເທດ​ທີ່​ມີ​ກົດ​ລະ­ບຽບ​ໃຫ້​ທຸກ​ບໍ­ລິ­ສັດ​ຈົດ​ທະ­ບຽນ ຕ້ອງ​ນຳ​ໃຊ້​ລະ­ບົບ​ດັ່ງ­ກ່າວ ສຳ­ລັບ ທຄຕລ ໃນ​ນາມ​ທີ່​ເປັນ​ທະ­ນາ­ຄານ​ທຸ­ລະ​ກິດ​ທຳ​ອິດ​ໃນ​ລາວ ທີ່​ໄດ້​ຈົດ​ທະ­ບຽນ​ໃນ​ຕະ­ຫຼາດ​ຫຼັກ​ຊັບ ກໍ​ໄດ້​ຕັດ­ສິນ​ໃຈ​ໃນ​ການ​ປັບ​ປ່ຽນ​ລະ­ບົບ​ການ​ບັນ­ຊີ ແລະ ລະ­ບົບ​ກວດ­ກາ​ພາຍ​ໃນ ຕາມ​ມາດ­ຕະ­ຖານ​ສາ­ກົນ ທັງ​ນີ້​ກໍ​ເພື່ອ​ເປັນ​ການ​ປະ­ຕິ­ບັດ​ຄື​ກັບ​ບັນ­ດາ​ບໍ­ລິ­ສັດ ທີ່​ໄດ້​ຈົດ​ທະ­ບຽນ​ໃນ​ຕະ­ຫຼາດ​ຫຼັກ​ຊັບ​ສາ­ກົນ ເພື່ອ​ສ້າງ​ຄວາມ​ໜ້າ​ເຊື່ອ​ຖື​ໃຫ້​ກັບ​ນັກ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ.

ບໍ­ລິ­ສັດ ເອີ​ສ​ແອນ​ຢັງ​ລາວ ແມ່ນ​ເປັນ​ບໍ­ລິ­ສັດ​ກວດ​ສອບ​ພາຍ​ນອກ ທີ່​ມີ​ຄວາມ​ຊ່ຽວ­ຊານ ແລະ ມີ​ຊື່​ສຽງ​ອັນ​ດັບ​ໂລກ ເຊິ່ງ​ເປັນ 1 ໃນ 4 ບໍ­ລິ­ສັດ​ກວດ​ສອບ​ທີ່​ໃຫຍ່​ລະ­ດັບ​ສາ­ກົນ ມີ​ສຳ­ນັກ­ງານ​ໃຫຍ່​ທີ່​ປະ­ເທດ​ອັງ­ກິດ ແລະ ມີ​ຕົວ​ແທນ​ຢູ່ 140 ປະ­ເທດ ແລະ ກໍ​ເປັນ​ບໍ­ລິ­ສັດ​ທີ່ ທຄຕລ ໄດ້​ຄັດ​ເລືອກ​ໃຫ້​ເປັນ​ຜູ້​ກວດ​ສອບ​ພາຍ​ນອກ​ມາ​ເປັນ​ເວ­ລາ 3 ປີ​ຊ້ອນ ແລະ ທຄຕລ ເອງ​ກໍ​ເຄີຍ​ເຫັນ​ຜົນ­ງານ ແລະ ຄວາມ​ສາ­ມາດ​ຂອງ​ທີມ​ງານ ເອີ​ສ​ແອນ​ຢັງ​ມາ​ແລ້ວ ດັ່ງ­ນັ້ນ ຈຶ່ງ​ໄດ້​ຕັດ­ສິນ​ໃຈ​ເລືອກ​ເອົາ​ບໍ­ລິ­ສັດ​ດັ່ງ­ກ່າວ ເປັນ​ບໍ­ລິ­ສັດ​ທີ່​ຈະ​ນຳ­ພາ ທຄຕລ ໃນ​ໂຄງ­ການ​ຫັນ­ປ່ຽນ​ລະ­ບົບ​ບັນ­ຊີ ແລະ ລະ­ບົບ​ກວດ­ກາ​ສາ­ກົນ.

Categories: Uncategorized | ใส่ความเห็น

ຄະນະລັດຖະບານ ຢ້ຽມຢາມຫໍປະຊຸມໃຫຍ່ອາເຊັມ

ພາຍ­ຫຼັງ​ກອງ​ປະ­ຊຸມ​ລັດ­ຖະ­ບານ ປະ­ຈຳ​ປີ 2012 ອັດ​ລົງ​ດ້ວຍ​ຜົນ­ສຳ­ເລັດ ໃນ​ວັນ​ທີ 10 ຕຸ­ລາ​ນີ້ ຄະ­ນະ​ລັດ­ຖະ­ບານ​ໄດ້​ຖື​ໂອ­ກາດ​ສຳ­ຄັນ ລົງ​ຢ້ຽມ­ຢາມ ແລະ ທ່ຽວ​ຊົມ​ຫໍ​ປະ­ຊຸມ​ໃຫຍ່ (NCC) ແຫ່ງ​ໃໝ່ ສຳ­ລັບ​ຮອງ​ຮັບ​ກອງ​ປະ­ຊຸມ​ສຸດ​ຍອດ​ອາ​ເຊັມ ຄັ້ງ​ທີ 9.

ທ່ານ ອະ­ພິ​ໄຊ​ຍະ​ເດດ ອິນ​ສີ​ຊຽງ​ໃໝ່ ຫົວ­ໜ້າ​ຄະ­ນະ​ຄຸ້ມ​ຄອງ​ໂຄງ­ການ​ຫໍ​ປະ­ຊຸມ​ແຫ່ງ​ຊາດ ໄດ້​ລາຍ​ງານ​ເມື່ອ​ບໍ່​ດົນ​ນີ້​ວ່າ: ປັດ­ຈຸ­ບັນ ການ​ກໍ່­ສ້າງ​ຫໍ​ປະ­ຊຸມ​ແຫ່ງ​ຊາດ ໂດຍ​ສະ­ເພາະ​ສິ່ງ​ປຸກ​ສ້າງ​ໄດ້​ສຳ­ເລັດ 100% ແລ້ວ ມີ​ຄວາມ​ພ້ອມ ແລະ ໄດ້​ເປີດ​ທົດ​ລອງ​ນຳ​ໃຊ້​ເພື່ອ​ຮອງ​ຮັບ​ກອງ​ປະ­ຊຸມ​ອາ​ເຊັມ​ຕົ້ນ​ເດືອນ​ໜ້າ ຊຶ່ງ​ຜົນ­ສຳ­ເລັດ​ດັ່ງ­ກ່າວ ໄດ້​ຮັບ​ການ​ຮ່ວມ​ມື​ຢ່າງ​ສະ­ໜິດ​ແໜ້ນ​ຈາກ ສປ.ຈີນ ແລະ ໄດ້​ຮັບ​ການ​ຊີ້​ນຳ​ຢ່າງ​ໃກ້­ຊິດ​ຈາກ​ຜູ້­ນຳ​ລະ­ດັບ​ຊາດ ເພື່ອ​ກະ­ກຽມ​ກອງ​ປະ­ຊຸມ​ອາ​ເຊັມ 9.

ຂະ­ນະ​ນີ້ ການ​ຕົກ­ແຕ່ງ​ພາຍ​ໃນ ແລະ ຕິດ​ຕັ້ງ​ອຸ­ປະ­ກອນ​ຮັບ​ໃຊ້​ປະ­ເພດ​ຕ່າງໆ ເຊັ່ນ: ລະ­ບົບ​ປ້ອງ​ກັນ​ຄວາມ​ປອດ​ໄພ ລະ­ບົບ​ສື່­ສານ ແລະ ລະ­ບົບ​ໄອ​ທີ​ສຳ­ເລັດ​ແລ້ວ ຫ້ອງ​ປະ­ຊຸມ​ດັ່ງ­ກ່າວ​ປະ­ກອບ​ມີ​ຫ້ອງ​ປະ­ຊຸມ​ໃຫຍ່ ສາ­ມາດ​ບັນ­ຈຸ​ຜູ້​ເຂົ້າ​ຮ່ວມ​ໄດ້ 1.500 ຄົນ ມີ 17 ຫ້ອງ​ປະ­ຊຸມ​ພົບ​ປະ ໄດ້​ເລີ່ມ​ກໍ່­ສ້າງ​ແຕ່​ຕົ້ນ​ເດືອນ​ທັນ­ວາ 2011 ເປັນ­ຕົ້ນ​ມາ ຊຶ່ງ​ໃຊ້​ເວ­ລາ​ກໍ່­ສ້າງ 9-10 ເດືອນ ໂດຍ​ມີ​ມູນ​ຄ່າ​ກໍ່­ສ້າງ 450 ລ້ານ​ຢວນ ສະ­ກຸນ​ເງິນ​ຈີນ ຫຼື ປະ­ມານ 80 ລ້ານ​ໂດ​ລາ​ສະ­ຫະ­ລັດ ຊຶ່ງ​ເປັນ​ທຶນ​ຊ່ວຍ­ເຫຼືອ​ລ້າ​ຈາກ​ລັດ­ຖະ­ບານ​ຈີນ.

Categories: Uncategorized | ใส่ความเห็น

ນະຄອນຫຼວງ ມີເຂດເສດຖະກິດພິເສດ 5 ແຫ່ງ

ສຳ­ລັບ​ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ສ້າງ­ຕັ້ງ​ເຂດ​ເສດ­ຖະ­ກິດ​ພິ­ເສດ​ແລ້ວ ຈຳ­ນວນ 5 ແຫ່ງ ເຊິ່ງ​ເປັນ​ເຂດ​ເສດ­ຖະ­ກິດ​ສະ­ເພາະ​ທັງ​ໝົດ ໃນ​ນັ້ນ​ເປັນ​ເຂດ​ທີ່​ຍົກ​ລະ­ດັບ​ຈາກ​ເຂດ​ພັດ­ທະ­ນາ​ທົ່ວ​ໄປ 4 ແຫ່ງ ຄື: ເຂດ​ນິ­ຄົມ​ອຸດ­ສາ­ຫະ­ກຳ ແລະ ການ​ຄ້າ ວຽງ​ຈັນ-ໂນນ​ທອງ ເຂດ​ເສດ­ຖະ­ກິດ​ສະ­ເພາະ​ດົງ​ໂພ​ສີ (ວຽງ​ຈັນ​ເນ​ລິ​ມິດ) ເຂດ​ເສດ­ຖະ­ກິດ​ສະ­ເພາະ ລອງ​ແທ່ງ-ວຽງ​ຈັນ ເຂດ​ພັດ­ທະ­ນາ​ກວມ​ລວມ​ໄຊ​ເຊດ​ຖາ ແລະ ເຂດ​ທີ່​ຕັ້ງ​ຂຶ້ນ​ໃໝ່ ແມ່ນ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ ໂດຍ​ທັງ​ໝົດ 5 ເຂດ ລ້ວນ​ແຕ່​ເປັນ​ໂຄງ­ການ​ທີ່​ນອນ​ໃນ​ແຜນ​ພັດ­ທະ­ນາ​ເສດ­ຖະ­ກິດ​ຂອງ​ນະ­ຄອນ­ຫຼວງ​ວຽງ​ຈັນ.

ເພື່ອ​ແນ­ໃສ່​ສ້າງ​ໃຫ້​ເຂດ​ດັ່ງ­ກ່າວ ມີ​ການ­ຈັດ­ຕັ້ງ​ເປັນ​ຮູບ​ປະ​ທຳ​ໂດຍ​ໄວ ບັນ­ດາ​ພາກ­ສ່ວນ​ກ່ຽວ­ຂ້ອງ​ໄດ້​ເອົາ­ໃຈ­ໃສ່​ຮ່າງ​ກົດ­ໝາຍ​ທີ່​ກຽວ​ຂ້ອງ​ໃຫ້​ມີ​ຄວາມ​ສົມ­ບູນ​ທີ່​ສຸດ ດັ່ງ­ນັ້ນ ວັນ​ທີ 9 ຕຸ­ລາ 2012 ຢູ່​ທີ່​ສູນ​ການ​ຮ່ວມ​ມື​ສາ­ກົນ ລາວ-ຍີ່­ປຸ່ນ (ຫຼັກ 5) ນະ­ຄອນ­ຫຼວງ​ວຽງ​ຈັນ ໄດ້​ຈັດ​ກອງ​ປະ­ຊຸມ​ທາບ​ທາມ​ຮ່າງ​ກົດ­ໝາຍ ວ່າ​ດ້ວຍ​ເຂດ​ເສດ­ຖະ­ກິດ​ພິ­ເສດ​ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ການ​ເປັນ​ປະ­ທານ​ຂອງ​ທ່ານ ດຣ. ອາ­ນຸ­ພາບ ຕຸ​ນາ​ລົມ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ມີ​ທ່ານ​ນາງ ບຸນ​ເພັງ ມູນ​ໂພ​ໄຊ ລັດ­ຖະ­ມົນ­ຕີ​ປະ­ຈຳ​ຫ້ອງ​ວ່າ­ການ​ລັດ­ຖະ­ບານ ທັງ​ເປັນ​ຮອງ​ຜູ້​ປະ­ຈຳ­ການ​ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ແລະ ເຂດ​ເສດ­ຖະ­ກິດ​ສະ­ເພາະ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ​ວ່າ­ການ ຫົວ­ໜ້າ​ກົມ ຫ້ອງ­ການ​ຈາກ​ໜ່ວຍ​ງານ​ກ່ຽວ­ຂ້ອງ ທັງ​ສູນ​ກາງ ແລະ ທ້ອງ­ຖິ່ນ.

ການ​ສ້າງ­ຕັ້ງ ແລະ ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ ເພື່ອ​ແນ­ໃສ່​ຈັດ​ຕັ້ງ​ປະ­ຕິ­ບັດ​ນະ­ໂຍ­ບາຍ​ບຸກ​ທະ­ລຸ​ຂອງ​ພັກ ດ້ານ​ການ​ພັດ­ທະ­ນາ​ເສດ­ຖະ­ກິດ ໂດຍ​ສະ­ເພາະ​ເປັນ​ການ​ສ້າງ​ສະ­ພາບ​ແວດ​ລ້ອມ​ທີ່​ດີ​ແກ່​ນັກ​ລົງ­ທຶນ ທັບ​ມ້າງ​ກົນ​ໄກ​ອະ­ນຸ­ມັດ​ທີ່​ມີ​ຫຼາຍ​ຂັ້ນ​ຫຼາຍ​ຂອດ ເພື່ອ​ກ້າວ​ໄປ​ສູ່​ການ​ບໍ­ລິ­ການ​ແບບ​ປະ­ຕູ​ດຽວ​ທີ່​ມີ​ປະ​ສິດ­ທິ​ຜົນ ແລະ ຖ້າ​ກົດ­ໝາຍ​ສະ­ບັບ​ນີ້​ຖືກ​ຮັບ­ຮອງ ແລະ ປະ­ກາດ​ໃຊ້​ຢ່າງ​ເປັນ​ທາງ​ການ ກໍ​ຈະ​ກາຍ­ເປັນ​ເຄື່ອງ­ມື​ນິ­ຕິ​ກຳ ເພື່ອ​ດຶງ​ດູດ​ການ​ລົງ­ທຶນ ແລະ ການ​ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ​ຂອງ ສປປ ລາວ ໃຫ້​ປະ­ກົດ​ຜົນ​ເປັນ​ຈິງ ມີ​ປະ​ສິດ­ທິ​ຜົນ ແລະ ເປັນ​ການ​ປະ­ກອບ­ສ່ວນ​ຢ່າງ​ຕັ້ງ­ໜ້າ ເຂົ້າ​ໃນ​ວຽກ​ງານ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໃຫ້​ກ້າວ​ຂຶ້ນ​ຢ່າງ​ບໍ່​ຢຸດ​ຢັ້ງ.

Categories: Uncategorized | ใส่ความเห็น

ຫຼວງພະ​ບາງ​ຈະ​ເພີ່ມ​ສີສັນ​ການທ່ອງທ່ຽວ​ໃຫ້ຫຼາຍຂື້ນ ​ເພື່ອ​ຮອງ​ຮັບ​ປີ​ທ່ອງ​ທ່ຽວລາວ 2012

ຍ້ອນລື​ຊື່ວ່າ​ເປັນ​ ເມືອງມໍລະດົກ​ໂລກ, ແລະ​​ເປັນ​ເຈົ້າພາບໃນ​ການຈັດ​ງານ​ແຂ່ງຂັນ​ກິລາ​ແຫ່ງ​ຊາດຄັ້ງ​ທີ IX, ເມືອງຫຼວງພະ​ບາງ​ພວມ​ໄດ້​ຮັບ​ຄວາມ​ສົນ​ໃຈ​ຈາກ​ນັກ​ທ່ອງ​ທ່ຽວທັງ​ພາຍ​ ໃນແລະຕ່າງປະ​ເທດຢ່າງຫຼວງຫຼາຍ, ບັນຍາ​ກາດການທ່ອງທ່ຽວຂອງເມືອງຫຼວງພະ​ບາງໃນປີນີ້ ມີ​ຄວາມ​ຄືກ​ຄັກຂື້ນ.

ເຈົ້າໜ້າທີ່ຂອງພະ ​ແນ​ກທ່ອງທ່ຽວແຂວງຫຼວງພະ​ບາງໃຫ້ສຳພາດວ່າ: ສະພາບ​ການ​ພັດທະນາ ​ແລະ ສົ່ງ​ເສີມ​ການທ່ອງທ່ຽວພາຍ​ໃນ​ແຂວງຫຼວງພະ​ບາງ ​ມີ​ທ່ວງທ່າ​ຂະຫຍາຍຕົວ ​ເນື່ອງຈາກ ຫຼວງພະ​ບາງ​ມີ​ຄວາມ​ສະຫງົບ, ຄວາມ​ເປັນ​ລະບຽບຮຽບຮ້ອຍ​ທາງ​ສັງຄົມ, ແລະ​ເສດຖະກິດ​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ. ​ໃນ​ໄລຍະໜຶ່ງປີຜ່ານມາເຫັນ​ວ່າ, ການ​ລົງທຶນ​ເຂົ້າ​ໃສ່​ພື້ນຖາ​ນ​ໂຄງ​ລ່າງ ​ເພື່ອ​ຮ​ອງຮັບ​ການທ່ອງທ່ຽວ ​ໄດ້​ມີ​ບັນຍາກາດ​ຟົດຟື້ນ, ນັກ​ລົງທຶນທັງ​ພາຍ​ໃນແລະຕ່າງປະ​ເທດ ​ໄດ້​ລົງທຶນ​ເຂົ້າ​ໃສ່​ການ​ພັດທະນາ​ໃນ​ຂະ​ແໜງການ​ບໍລິການ ສູງ​ເຖີງ 83 ຕື້ກວ່າ​ກີບ​. ສິ່ງ​ທີ່​ຍິນ​ດທີ່​ສຸດ​ກໍ​ຄື  ຫຼວງພະ​ບາງ​ສາມາດ​ຍາດ​ໄດ້​ລາງວັນຊະນະ​ເລີດ​​ເມືອງ​ຍອດ​ນິຍົມ​ດ້ານ ​ການທ່ອງທ່ຽວ ຈາກ​ວາລະສານ​ວັນ​ເດີ​ລັດສ໌ ​ໃນ​ປີ 2011. ​ໃນ ປີ 2011 ​ໄດ້​ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວຊົມ ​ແລະ ພັກ​ເຊົາ​ຢູ່​ແຂວງ ຫຼວງພະ​ບາງ​ທັງໝົດ 1.894.542 ​ເທື່ອ​ຄົນ, ​ໃນ​ນັ້ນ​ເປັນ​ຊາວ​ຕ່າງ​ປະ​ເທດ 274.506 ຄົນ, ທຽບ​ໃສ່​ໄລຍະ​ດຽວກັນ​ຂອງ​ປີຜ່ານມາ​ເພີ່ມ​ຂື້ນ 26,57%. ສ່ວນ​ໃຫຍ່​ແມ່ນ​ນັກ​ທ່ອງ​ທ່ຽວມາ​ຈາກ ທະວີບ​ເອີ​ລົບ, ອາ​ເມ​ລິ​ກາ, ອາຊີ ​ແລະ ອາ​ຟຼິກກາ, ສ່ວນ​ນັກ​ທ່ອງທ່ຽວພາຍ​ໃນມີ 1.647.036 ຄົນ, ຊຶ່ງ​ສາມາດ​ສ້າງ​ລາຍ​ຮັບ​ຈາກ​ການທ່ອງທ່ຽວ​ໄດ້​ທັງໝົດ 164.703.600 ​ໂດ​ລາ.

ທ່ານ ຄຳ​ຜຸຍ ພົມມະ​ວົງ ຫົວໜ້າພະນ​ແນ​ກທ່ອງ​ທ່ຽວແຂວງຫຼວງພະ​ບາງກະຊວງຖະ​ແຫຼງຂ່າວ,ວັດທະນະທຳ ​ແລະ ທ່ອງ​ທ່ຽວ ​ກ່າວ​ວ່າ: ​ເພື່ອ​ປະຕິບັດ​ແຜນ​ຍຸດ​ຖະສາດ​ໃນ​ການ​ພັດທະນາ ຄື: ສ້າງ​ໃຫ້​ແຂວງຫຼວງພະ​ບາງ​ໃຫ້​ກາຍ​ເປັນ​ໃຈກາງ​ການທ່ອງທ່ຽວຂອງ​ບັນດາ​ແຂວງ​ພາກ ​ເໜືອ, ສ້າງ​ຄວາມ​ສົນ​ໃຈ ​ແລະ ດຶງ​ດູດ​ເອົາ​ນັກ​ທ່ອງ​ທ່ຽວທັງ​ພາຍ​ໃນແລະຕ່າງປະ​ເທດ​ເຂົ້າ​ມາ​ທ່ຽວ​ໃຫ້​ນັບ​ ມື້ຫຼາຍຂື້ນ. ​ໃນ​ປີ 2012 ນີ້, ຕ້ອງ​ສູ້​ຊົນ​ດຶງ​ດູດ​ນັກ​ທ່ອງ​ທ່ຽວສາກົນ​ເຂົ້າ​ມາ​ທ່ຽວຊົມ​ໃຫ້​ໄດ້​ປະມານ 360.000 ​ເທື່ອ​ຄົນ ​ແລະ ນັກ​ທ່ອງ​ທ່ຽວພາຍ​ໃນ​ໃຫ້​ໄດ້ 2.100.000 ​ເທື່ອ​ຄົນ, ຄາດ​ວ່າ​ຈະ​ສາມາດ​ສ້າງ​ລາຍ​ຮັບ​ຈາກ​ການທ່ອງທ່ຽວປະມານ 175 ລ້ານ​ກວ່າ​ໂດ​ລາ.

ທ່ານ ຄຳ​ຜຸຍ ພົມມະ​ວົງ ກ່າວ​ວ່າ: ປີ 2012 ​ເປັນ​ປີ​ທ່ອງທ່ຽວລາວ, ສະ​ນັ້ນ​ຈຶ່ງ​ເຮັດ​ໃຫ້​ພວກ​ເຮົາ​ເລັ່ງສ້າງ​ເງື່ອນ​ໄຂ​ເພື່ອ​ຮອງ​ຮັບ​ເປັນ​ ຕົ້ນ: ການ​ພັດທະນາ ​ແລະ ສົ່ງ​ເສີມ​ການທ່ອງທ່ຽວ, ​ແມ່ນ​ຈະ​ໃຫ້​ຕິດ​ພັນ​ກັບ​ການ​ອະນຸລັກ​ຮັກສາ​ມໍລະດົກ​ທາງ​ດ້ານ​ວັດທະນະທຳ,ທຳ ​ມະ​ຊາດ, ປະຫວັດສາດ ​ແລະ ຊີວະ​ນາໆພັນ, ພ້ອມ​ທັງ​ມີ​ການ​ຮ່ວມ​ມື​ຈາກ​ທຸກໆພາກສ່ວນ​ຂອງ​ຂະ​ແໜງການ​ຂອງ​ລັດ, ​ເອກ​ກະ​ຊົນ ​ແລະ ຊຸມ​ຊົນ​ຕ່າງໆ. ​ແນ​ໃສ່​ເພື່ອ​ສ້າງ​ຄວາມ​ຍືນ​ຍົງ​ໃຫ້​ແກ່​ການ​ພັດທະນາ ​ແລະ ສົ່ງ​ເສີມ​ການທ່ອງທ່ຽວ ດ້ວຍຫຼາຍຮູບ​ແບບ ​ແລະ ຫຼາຍສີສັນ, ຮັກສາ​ໄດ້​ຮີດຄອງ​ປະ​ເພນີ​ອັນ​ດີງາມ​ຂອງ​ຊາວ​ຫຼວງພະ​ບາງ​ເມືອງ​ມໍລະດ​ໂລກ ​ໃນ​ການ​ດຶງ​ດູດ​ນັກ​ທ່ອງ​ທ່ຽວທັງ​ພາຍ​ໃນ ​ແລະ ຕ່າງປະ​ເທດ.

ຫຼວງພະ​ ບາງ​ມີ​ແຫຼ່ງທ່ອງ​ທ່ຽວທັງໝົດ 220​ ​ແຫ່ງ, ​ໃນ​ນັ້ນ ​ແຫຼ່ງທ່ອງ​ທ່ຽວດ້ານ​ວັດທະນະທຳ 82 ​ແຫ່ງ, ທ່ອງ​ທ່ຽວດ້ານ​ທຳ​ມະ​ຊາດ 106 ​ແຫ່ງ ​ແລະ ​ແຫຼ່ງທ່ອງ​ທ່ຽວດ້ານ​ປະຫວັດສາດ 32 ​ແຫ່ງ. ພະ​ແນ​ກແຜນການ ​ແລະ ການ​ລົງທຶນແຂວງຫຼວງພະ​ບາງ ກ່າວ​ວ່າ: ​ໃນປີຜ່ານມາ ​ໄດ້​ອອກ​ໃບ​ອານຸຍາດ​ຜູ້​ລົງທຶນດຳ​ເນີນ​ທຸລະ​ກິດ​ໂຮງ​ແຮມ ​ແລະ ລີ​ສອດ​, ເປີດ​ບໍ​ລິ​ການ​ໃໝ່ 6 ​ແຫ່ງ, ​ເຮືອນ​ພັກ 10 ຫຼັງ, ຮ້ານ​ອາຫານ 8 ຮ້ານ. ມີ​ບໍລິສັດ​ທ່ອງ​ທ່ຽວ ​ແລະ ສາຂາ​ທັງໝົດ 50 ບໍລິສັດ. ທ່ານ ຄຳ​ຜຸຍ ພົມມະ​ວົງ ຫົວໜ້າ ພະນ​ແນ​ກທ່ອງ​ທ່ຽວ ​ແຂວງຫຼວງພະ​ບາງ ກະຊວງຖະ​ແຫຼງຂ່າວ,ວັດທະນະທຳ ​ແລະ ທ່ອງ​ທ່ຽວ ​ກ່າວ​ວ່າ: ສິ່ງ​ທີ່​ຕ້ອງ​ເນັ້ນ ​ແລະ ​ເອົາ​​ໃຈໃສ່​​ແກ້​ໄຂ ​ແມ່ນ​ປະກົດ​ການ​ຫຍໍ້​ທໍ້​ໃນ​ສັງຄົມ​ຍັງ​ເຫັນ​ວ່າບໍ່ທັນ​ສະຫງົບ​ເທົ່າ​ທີ່​ ຄວນ, ​ເປັນ​ຕົ້ນ​ບັນຫາ​ການ​ດຶງ​ກະ​ເປົາ​ຂອງ​ນັກ​ທ່ອງ​ທ່ຽວ, ການ​ສໍ້​ໂກງ​ນັກ​ທ່ອງ​ທ່ຽວດ້ານ​ການ​ບໍລິການ​ຕ່າງໆ. ການ​ລັກລອບ​ບໍລິການ​ນັກ​ທ່ອງ​ທ່ຽວຂອງ​ບັນດາ​ບໍ​ລິດ​ສັດ​ພະຈົນ​ໄພ​ຢູ່​ຕາມ​ ບັນດາ​ແຫຼ່ງທ່ອງ​ທ່ຽວທາງ​ທຳ​ມະ​ຊາດ ​ແລະ ໝູ່ບ້ານ​ຊົນ​ເຜົ່າ. ​ເສັ້ນທາງ​ລາຍການ​ຍ່າງ​ປ່າ​ທ່ຽວຊົມໝູ່ບ້ານ​ຊົນ​ເຜົ່າ​ຖືກ​ຫັນ​ໄປ​ເປັນ​ກໍາມະ ​ສິດ​ຂອງ​ນັກທຸລະກິດ, ດຳ​ເນີນ​ກິດຈະການ​ທາງ​ດ້ານ​ກະສິກຳ ທີ່​ສົ່ງ​ຜົນ​ກະທົບ​ຕໍ່ສິ່ງ​ແວດ​ລ້ອມ, ຊີວະ​ນາໆພັນ, ປ່າ​ໄມ້ ​ແລະ ນ້ຳບົກ​ແຫ້ງ, ​ເປັນ​ການ​ທຳລາຍ​ພາບ​ພົດອັນ​ສວຍ​ງາມ​ທາງ​ດ້ານ​ທຳ​ມະ​ຊາດ​ຊຶ່ງ​ບໍ່​ເປັນ​ການ​ ດຶງ​ດູດ​ໃຈ​ນັກ​ທ່ອງ​ທ່ຽວ.

Categories: Uncategorized | ใส่ความเห็น

2012 ປີ​ທ່ອງ​ທ່ຽວລາວ ຫວັງ​ນັກ​ທ່ອງ​ທ່ຽວ​ເຂົ້າ​ມາລາວ 2 ລ້ານ 6 ​ແສນ​ຄົນ

ປີ​ທ່ອງ​ທ່ຽວລາວ​ຄັ້ງ ​ທີ1 ​ໄດ້​ເປີດ​ຂື້ນ​ໃນ​ປີ 1999-2000, ການ​ເປີດ​ປີ​ທ່ອງ​ທ່ຽວລາວ​ຄັ້ງ​ທີ2 ມີ​ຂື້ນ​ໃນ​ວັນ​ທີ່31 ທັນວາ 2011ຜ່ານ​ມາ.

ການ​ເປີດ​ປີ​ທ່ອງ​ທ່ຽວປີ​ ນີ້​ນັບ​ວ່າ​ເປັນ​ເທື່ອ​ທີ2 ຂອງ​ປະ​ເທດ​ລາວ, ພາຍຫຼັງລາວ​ໄດ້​ເປີດ​ປີ​ທ່ອງ​ທ່ຽວລາວ​ຄັ້ງ​ທຳ​ອິດ​ໃນ​ເມື່ອ11 ປີ​ກ່ອນ(1999-2000), ນັບ​ແຕ່​ນັ້ນ​ມາ​ການທ່ອງທ່ຽວລາວ​ໄດ້​ຮັບ​ການ​ຂະຫຍາຍຕົວ​ຢ່າງ​ຕໍ່​ເນື່ອງ, ມີ​ຈຳນວນ​ນັກ​ທ່ອງ​ທ່ຽວ​ເຂົ້າ​ມາລາ​ວ​ເພີ່ມ​ຂື້ນ​ໃນ​ອັດຕາ​ສະ​ເລ່ຍ 25 %.

ສະ ​ເພາະ​ປີຜ່ານ​ມາ​ມີ​ນັກ​ທ່ອງ​ທ່ຽວ​ເຂົ້າ​ມາລາ​ວ 2ລ້ານ 5 ​ແສນ​ເທື່ອ​ຄົນ, ​ແລະ​ເປົ້າໝາຍຂອງ​ປີ​ທ່ອງ​ທ່ຽວລາວ 2012 ນີ້​ໄດ້​ມີ​ເປົ້າໝາຍທີ່​ຈະ​ດຶງ​ດູດ​ເອົານັກ​ທ່ອງ​ທ່ຽວ​ເຂົ້າ​ມາລາ​ວ 2ລ້ານ 6​ແສນ​ຄົນ​.

ປັດ​ຈຸ​ບັນ​ທົ່ວ​ປະ​ເທດ​ລາວ​ມີ​​ໂຮງ​ແຮມ 357 ​ແຫ່ງ, ​ເຮືອນ​ພັກ 1127 ​ແຫ່ງ, ຮ້ານ​ອາຫານ 1246 ​ແຫ່ງ​ແລະ​ສະຖານ​ທີ່​ທ່ອງ​ທ່ຽວທາງ​ທຳ​ມະ​ຊາດ​ແລະ​ວັດທະນາ​ທຳ 1493​ແຫ່ງ ​ໃນ​ນີ້​ມີ​ພຽງ 456 ​ແຫ່ງ​ທີ່​ໄດ້​ຮັບ​ການ​ພັດທະນາ​ສາມາດ​ຮັບ​ນັກ​ທ່ອງ​ທ່ຽວ​, ​ໃນ​ຂະນະ​ນີ້​ໂຮງ​ແຮມ​ແລະ​ຮ້ານ​ອາຫານ​ສາມາດ​ຮັບ​ນັກ​ທ່ອງ​ທ່ຽວ​ເຂົ້າ​ພັກ​ ເຊົ່າ​ໄດ້​ທັງໝົດ 37 500 ຄົນ​ຕໍ່ມື້.​

ແຂວງ​ທີ່​ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວຫຼາຍກວ່າໝູ່​ແມ່ນ​ແຂວງຫຼວງພະ​ບາງ, ນະຄອນຫຼວງວຽງຈັນ​ແລະ​ແຂວງ​ຈຳປາ​ສັກ.

ນັກ ​ທ່ອງ​ທ່ຽວທີ່​ເຂົ້າ​ມາ​ທ່ຽວລາວ​ແມ່ນ​ມາ​ຈາກ​ຂົງ​ເຂດ​ອາຊີ​ປາຊີ​ຟິກ 2 ລ້ານ 2 ​ແສນ ກວມ 90 %, ສ່ວນ​ທີ່​ເຫຼືອ​ແມ່ນ​ມາ​ຈາກ​ທະວີບອາ​ເມ​ລິ​ກາ​ມີ 6ໝື່ນຄົນ, ມາ​ຈາກ​ທະວີບອັບ​ຟຼິກາ​ແລະ​ຕາ​ເວັນ​ອອກ​ກາງ ມີ​ພຽງ 7 ພັນ​ຄົນ.

Categories: Uncategorized | ใส่ความเห็น

Hello world!

Welcome to WordPress.com! This is your very first post. Click the Edit link to modify or delete it, or start a new post. If you like, use this post to tell readers why you started this blog and what you plan to do with it.

Happy blogging!

Categories: Uncategorized | 1 ความเห็น

Create a free website or blog at WordPress.com. The Adventure Journal Theme.

ติดตาม

Get every new post delivered to your Inbox.